همّتي

الأسئلة الشائعة

أسئلة بتنسأل كثير،
وأجوبتها بصراحة.

مقسّمة حسب الموضوع. وإذا ما لقيت جوابك، اسألنا على واتساب وبنرد عليك.

الدفع والأسعار

هل المصاري بتوصلني أنا مباشرة؟

أكيد. إنت بتستلم من طلابك بطريقتك: CliQ، زين كاش، رابط دفع، أو بطاقات تفعيل بالمكتبات. همّتي ما بتاخذ ولا قرش من مبيعاتك، بتدفع بس اشتراك المنصّة.

بتاخذوا نسبة من مبيعاتي؟

ولا قرش. بتدفع اشتراك المنصّة والإضافات اللي بتختارها بس، وكل اللي بتبيعه إلك.

هل يمكن الدفع شهرياً؟

لا. اشتراك المنصّة سنوي ويُدفع دفعة واحدة. الرقم الشهري المعروض (20.83 ديناراً لباقة 20 ساعة، 29.17 ديناراً لباقة 50 ساعة، 41.67 ديناراً لباقة 100 ساعة، و20.83 ديناراً للتطبيق الخاص) هو السعر السنوي مقسوماً على 12 للمقارنة فقط، وتُدفع سنوياً دفعة واحدة. بعض الإضافات، مثل مساحة الملفات والساعات الإضافية، لها تسعير شهري مستقل.

هل توجد رسوم إضافية على الدفع؟

نعم. تُضاف رسوم معالجة الدفع الإلكتروني التي تفرضها PayPal إلى مبلغ الاشتراك، وتظهر في ملخص الطلب كبند مستقل مع الإجمالي المستحق قبل إتمام الدفع. هذه الرسوم لا تذهب إلى همّتي، وسعر الباقة نفسه لا يتغيّر.

ليش الباقات بالساعات؟ وشو بصير إذا خلصت ساعاتي؟

لأن الساعات هي اللي بتكلّفنا فعلاً: الطلاب والمشاهدات بلا حدود بكل الباقات، والفرق بس بكم ساعة فيديو بتخزّن (20 أو 50 أو 100). بنبعتلك تنبيه قبل ما توصل للحد، وبتكبّر مكتبتك بالترقية لباقة أكبر، أو بتضيف +100 أو +250 أو +500 ساعة إذا كنت على باقة 100. ولا فيديو من فيديوهاتك بيوقف.

ليش الساعات الإضافية لباقة 100 بس؟

عشان ما تطلع الإضافة أرخص من الباقة الأكبر. على باقة 20 أو 50 الترقية لباقة أكبر أوفر لك (ساعة الفيديو بتنزل من 12.5 د.أ لـ 7 لـ 5). والتطبيق الخاص متاح من باقة 50 وفوق.

شو بصير بفيديوهاتي إذا ما جدّدت؟

بنذكّرك قبل التجديد بوقت كافي، وبنعطيك مهلة تنزّل فيها بياناتك وقوائم طلابك قبل أي حذف.

عندي أكاديمية فيها كذا مدرّس، في خطة إلنا؟

اطلب عرض وبنجهّزلك خطة على مقاسكم: ساعات أكثر، عدة مدرّسين، و DRM للويب إذا بدكم.

حماية المحتوى

بقدر الطالب يصوّر الشاشة ويسرّب الدروس؟

داخل تطبيق همّتي التصوير والتسجيل ممنوعين. على المتصفح ما في منصة بالعالم بتقدر تمنعه 100%، بس العلامة المائية برقم الطالب بتخلّينا نعرف مين سرّب خلال دقائق.

هل بتمنعوا تصوير الشاشة على المتصفح؟

لا، وما في منصة بتقدر تمنعه 100% على المتصفح لأنه ما بيسمح بهالشي. اللي بنعمله: علامة مائية متحرّكة برقم الطالب، وكشف المسرّب، ومشاهدة آمنة عبر تطبيق همّتي اللي بيمنع التصوير والتسجيل.

كيف بتعرفوا مين سرّب الفيديو؟

كل طالب بيشوف نسخة عليها رقمه وآخر أرقام تلفونه بشكل متحرّك. بترفع المقطع المسرّب من لوحة التحكم، وبنطلعلك الطالب خلال دقائق.

شو يعني «التشغيل من التطبيق فقط»؟

خيار بلوحة التحكم بيخلّي الفيديوهات تشتغل بس من تطبيق همّتي (أو تطبيقك الخاص)، وين تصوير الشاشة وتسجيلها ممنوعين. الموقع بيضل للتسجيل والدفع.

هل في DRM؟

متوفّر عند الطلب للأكاديميات الكبيرة (Widevine و FairPlay) عبر مزوّد خارجي، وبيتسعّر حسب عدد التراخيص.

كم جهاز بقدر الطالب يستخدم؟

جهازين لكل طالب. إذا غيّر تلفونه، بتعيد ضبط أجهزته من لوحة التحكم بضغطة.

التطبيق

وين بنزّل تطبيق همّتي؟

قريباً على Google Play و App Store. لحد ما ينزل، الطالب بيحضر من موقع منصّة أستاذه على المتصفح، وبنعلن هون أول ما التطبيق ينتشر.

شو الفرق بين تطبيق همّتي والتطبيق الخاص؟

تطبيق همّتي مجاني وبيجمع كل المنصّات بمكان واحد بهوية همّتي. التطبيق الخاص (+250 د.أ بالسنة، من باقة 50 ساعة وفوق: 600 مع باقة 50 و750 مع باقة 100) بينزل بالمتجر باسمك وشعارك، والإشعارات بتطلع باسمك.

ليش ما في شراء من داخل التطبيق؟

لأن Apple و Google بياخذوا 15–30% من كل عملية شراء. الطالب بيشترك من موقعك أو بكود تفعيل، والتطبيق للمشاهدة بس، فبتضل مصاريك كاملة.

مين بيدفع رسوم حسابات المتاجر للتطبيق الخاص؟

الأستاذ. Apple بتطلب إن التطبيق ينشر من حساب صاحب المحتوى (99 دولار بالسنة)، و Google Play رسمه 25 دولار مرة وحدة. وإحنا بننشر التطبيق بالنيابة عنك.

المنصّة والنقل

بقدر أربط دومين خاص فيني؟

منصّتك بتشتغل فوراً على رابط ⁦____.himmaty.com⁩، وبتقدر تربط دومينك الخاص (مثل academy.jo) من لوحة التحكم.

عندي طلاب ودورات على منصة ثانية، بتساعدوني أنقلهم؟

احكي معنا وبنرتّب النقل معك: الفيديوهات، قوائم الطلاب، والاشتراكات الفعّالة، عشان طلابك ما يحسّوا بأي فرق.

كيف بيسجّل الطالب دخول؟

برقم تلفونه ورمز تحقق (OTP) بيوصله على واتساب أو SMS. ما في كلمة سر بتنسى، وبتشحن رصيد OTP من لوحة التحكم.

الفيديوهات ملك مين؟

ملكك إنت. إحنا بنخزّنها ونحميها ونعرضها لطلابك بس، وبتقدر تطلب بياناتك وقوائم طلابك قبل ما تلغي اشتراكك.

جاهز تطلق منصّتك؟

احكي معنا على واتساب اليوم، وبنجهّز منصّتك وإنت بترفع أول درس. وإذا علقت بأي خطوة، إحنا معك.